Ekipa Tékniku UE Aprezenta Grupu Observadór ba STAE

sexta-feira, 10 de fevereiro de 2017
Ekipa Tékniku UE Aprezenta Grupu Observadór ba STAE

DILI, (ANTIL) – Hodi halo observasaun ba eleisaun prezidensiál tinan ne’e, ekipa tékniku hosi Uniaun Europeia (UE) aprezenta grupu observadór tolu ba Sekretaria Tékniku Administrasaun Eleitorál (STAE) iha Kaikoli, Sesta (10/2).

“Ohin ekipa tékniku nain rua hosi UE hato’o lista observadór hosi grupu tolu ne’ebé mak atu mai halo observasaun iha prosesu eleisaun prezidensiál no parlamentár”, Diretór Jerál STAE, Acilino Manuel Branco ba ANTIL hafoin hasoru malu ho ekipa UE.

Hosi observadór sira ne’e, grupu dahuluk sei to’o Timor-Leste aban ho ema nain 26, grupu daruak, semana oin nain 40 no besik eleisaun mak grupu ikus mai ho ema hamutuk 13.

Nia esplika, grupu tolu ne’e sei mai hosi nasaun ne’ebé integra-án hosi UE ne’ebé hamutuk ema nain 79 inklui deputadu nain lima hosi UE ne’ebé sei prezensa nu’udar observadór. Hosi sira ne’e sei haree besik iha prosesu eleisan prezidensiál ne’ebé sei akontese iha 20 Marsu.

“Sira husu mai STAE atu bele esplika prosedimentu prosesu eleisaun no oinsá bele fó akreditasaun ba rekerimentu ne’ebé sira hatama mai orgaun eleitorál atu bele hetan asesu iha festa demokrásia”, haktuir nia.

Hosi observadór sira ne’e balun halo observasaun ba dala rua iha Timor-Leste iha  2007 no 2012 hosi nasaun sira ne’ebé integra-án iha UE.

Entretantu, observadór la’os mai de’it hosi UE maibé hosi organizasaun Austrália Frienship no Estadus Unidus Amerika (EUA) hato’o ona pedidu rekerimentu atu STAE bele fó akreditasaun. (jornalista: Zezito Silva; editora: Rita Almeida)

Foto: Diretór Jerál STAE, Acilino Manuel Branco halo reuniaun ho ekipa UE kona-ba aprezentasaun observadór eleisaun prezidensiál iha Kaikoli, Sesta (10/2) Foto STAE