LEI PENSAUN VITALISA “KORUPSAUN LEGAL”

LEI PENSAUN VITALISA

“KORUPSAUN LEGAL”

       Nasaun Timor Leste nebe’e nakonu ho milagre hodi ukun rasik an iha 20 de maio 2002 hatudu ba mundu katak maske nia kik maibe nia serve duni atu kaer rasik kuda talin. Povu Timor tomak kontenti bainhira rona resultadu eleisaun hosi ONU iha dia 04/09/1999 nebe anunsiu ho votus maioria Pro ukun an maka manan. Komesa kaer rasik estado iha 20 de maio 2002 hanesan desafiu bot ida nebe Timor oan sira tenki hasoru. Fretilin hanesan partidu historiku nebe’e kaer primeiru Governu konstitusional RDTL senti todan atu lori mesak governu foun, maibe ida nee mak konsekuensi nebe’e tenki simu hanesan resultado hosi nasaun foun. Iha problema oin-oin nebe mosu iha TL liu-liu konaba governu hanesan sumbrina ba nasaun TL. Problema konaba povu nia ejijensia ba vida moris lor-loron, hanesan uma, be mos, eskola, Estrada, no nesesidade seluk tan. Problema KKN mos mosu dadaun bainhira Timor oan kaer rasik governu foun. Spesifiku liu konaba Lei Pensaun Vitalisa. Kriasaun Lei Pensaun Vitalícia (LPV) ba eis-titulares e nune’e mos Lei Pensão Mensal Vitalícia dos Deputados e Outras Regalias -LPMVDOR- husi autoridades politika iha fim de mandatu politika tinan 2007 liu ba bele hare hanesan buat nebe’e mak Oliver Goldsmith hateten, “lei sama-hanehan ema kiak, no ema riku maneija lei.” Ida ne’e siknifika katak ema riku (riku materia, riku poder) maneija lei atu sama-hanehan ema kiak sira. Kritikas kona ba’a LPV/LPMVDOR ne’e mosu husi komunidades, no kritikas ne’e sai a’as wainhira Dr. Mari Alkatiri sira seluk bazeia ba LPV husu ninia direitu pensaun vitalicia nudar eis-titular iha nasaun ne’e.

       Servisu iha governu no estadu signifika katak servisu ba nasaun I povu TL. Bainhira Dr.Mari ho esi-deputadus sira seluk husu nia kolen durante servisu iha governu, nee hanesan aksaun ida nebee mak “la serve” para fundadores nasaun TL hatudu ba povu TL iha rai doben Timor. Lei Pensaun Vitalisia hatudu mo-mos katak “Korupsaun Legal” mosu iha Nasaun Timor Leste. Uluk seidauk ukun an povu Timor sempre hakilar “halakon I duni sai kolonialismu” maibe too ona ukun an-na realidade agora lideransa ho nai ulun sira mak sai kolonial ba nia povu rasik. Estudantes hosi Universidade balun hanesan UNTL, UNITAL no universidade sira seluk hakilar kritika halo demonstrasaun atu halakon LPV, mas ate agora laiha resultado ba kritikasaun hirak nee. LPV ba eis-titulares iha nasaun barak existe, maibe LPV ho montante nebe’e mak mensiona iha LPV Timor-Leste nian nebe’e mak atu kobre nesesidades tomak eis-titulares ho sira nia familia husi A to’o Z hatudu katak lei nee defende makaas eis titulares no eis deputadus sira.

       Timor-Leste iha Lei hodi fo’o vencimento firmi ba eis-Deputados sira, nasaun seluk keta la’e karik. Simu osan tomak no plus-plus la siknifika katak pensiunista politika sira simu osan pensaun, maibe simu vensimentu doubradu. Iha nasaun nebe’e deit buat ida naran osan pensaun sempre hetan redusaun ida bo’ot husi osan inan vensimentu fulan-fulan nian nebe’e mak pensiunista ida simu wainhira sei aktivu servisu. Halo lei la’os atu proteje deit ema ka grupu ida nia interese, sa’a tan ho objetivu atu habokur grupu ki’ik iha maioria povu kiak nia let. Hanesan sidadaun Nasaun TL, Senti triste tebes baihira rona, hare, I senti dezenvovementu nebe maka agora dadaun iha Nasaun nia laran. Korupsaun mosu iha fatin hotu-hotu iha instansi nebee deit, mas realidade povu kiak nia vida at nafatin.Abraham Lincoln 

Abraham Lincoln hateten konaba demokrasia “government of the people, by the people, for the people”. Baseia ba teoria demokrasia, Povu iha direitu atu moris diak iha nasaun ida nia laran, hetan fasilidade nebee maka diak hosi estado no governu iha nasaun ida nia laran, hanesan estrada, be mos, uma, eskola, hospital no seluk tan. Karik nesesidades hirak nee maka prense ona iha TL maka povu nia moris bele hakmatek I valor ideologia demokrasia iha Republika Demokratika De Timor Leste (RDTL) presija fo thumb. Mas realidade buat hirak nee too agora sei dok hosi povu Timor nia espetativa.

       Tenki halakon Lei pensaun vitalisia!!! Tamba lei pensaun vitalisia sei hamate dezenvolvementu iha nasaun laran, hakiak povu nia moris, hariku eis titulares I eis deputadus sira. Iha aiknanoik ida “ema nebee riku riku ba bebeik, ema nebee kiak kian ba bebeik”. kuitadu karik ida nee maka mosu I ita labele halakon, taun it abele hateten “merdeka tanpa tujuan” ou ukun an laiha funsaun. Timor ukun an durante tinan 17 nia laran la serve ona para ita dehan “nasaun sei foun” nee duni tenki simu konsekuensia ida neee. Se karik ita husik hela buat hirak nee maka akontese ba bebeik maka povu nia moris sei terus ba bebeik, povu sei la senti resultadu ukun an nebee maksimun.

        Filozofikamente halo lei tenki bazeia a’an ba principle of equity (azas kepatutan –redelijkheid-) no  principle of justice (azas keadilan –billijkheid-), lahos baseia ba interese partidu I politika nebe maka sei hamate povu nia moris.

        Hare ba rejeitasaun husi sosiadade kona ba LPV/LPMVDOR tamba sai hanesan skandalu moral bo’ot nebe’e ukun nain sira hatudu ba publiku nasaun ne’e, hau sugere atu iha biban ida ne’e estadu no governu buka dalan atu hola medidas politika ruma hodi pending ka anula lei rua ne’e. Governu aktual no estadu iha k’bit politika no moral tomak atu hola medidas hodi halo anulasaun ba lei rua ne’e. Governu no estadu presiza halo estudu ida klean ba materia ne’e atu nune’e iha loron ikus bele hetan rezultadu ida diak no aseitavel. Iha tinan ida ka rua ne’e nia laran, governu bele hola lai medidas politika hodi buka atu fo’o uluk lai medaia dekorasaun ruma ba eis-titulares no eis-deputadus sira hotu, atu nune’e sira bele hein prosesu foun kona ba’a LPV/LMPVDOR.

       Ita povu mukit fo fiar nafatin ba deputadus sira nebe mak kontra LPV/LMPVDOR, I mos ba forsa sosial hanesan Igreja, NGO no komunidade sivil atu nunee bele halakon LPV/LMPVDOR. Iha mos cela atu komunidade civil bele hatama keixa ba Tribunal hasoru LPV/LPMVDOR nebe’e korupta. Husu mos Komisaun Anti Korupsaun (KAK) atu toma responsabel ba problemas hirak nee. ita hein atu komisaun refere bele toma mos medidas hodi halo evaluasaun bo’ot, luan no klean ba’a produsaun leis nebe’e mak durante ne’e instituisaun politika soberania nasaun ne’e produz. Komisaun Anti Korupsaun presiza hato’o rekomendasaun hodi bele fokit leis nebe’e korupta no leis nebe’e mak hamosu injustisa sosial no ekonomika ba’a povu iha nasaun ne’e. Partes hot-hotu tenki hamrik atu buka medidas nebe’e lais atu prevene no halakon LPV/LPMVDOR nebe’e korupta no hamosu skandalu moral, I sei ‘naok’ riku-soin povu no nasaun nian hodi habokur partidus I grupu balun, no lideransa sira iha nasaun ne’e. implikasaun hosi LPV/LPMVDOR sei fo impaktu nefativu ba dezemvolvementu nasaun ida ne’e, no bele halo monu nasaun tanba korupsaun.

…Martinho Noronha Dos Santos…